બીજી તો કોઈ રીતે ના ભૂંસાય ચાંદની

બીજી તો કોઈ રીતે ના ભૂંસાય ચાંદની,

ઝાકળની થોડી બુંદોથી ધોવાય ચાંદની.

પીને શરાબ ઉભો’તો સપનાંય ના જુઓ,

તરસ્યા રહીને જાગો તો પીવાય ચાંદની.

તું આંખ સામે હોય તો એવુંય પણ બને,

ખીલ્યો હો ચંદ્રમા ને ન દેખાય ચાંદની.

તારા સ્મરણનું તેજ મને ડંખતું રહે,

ઉપરથી પાછી એમાં ઉમેરાય ચાંદની.

‘ઓજસ’ ધરે છે કોણ આ દર્પણ ગગન ઉપર,

દિવસનું તેજ રાતે બની જાય ચાંદની.

– ઓજસ પાલનપુરી