પૂરતું છે
ઓરડામાં એકાદ ચિત્ર હોય પૂરતું છે,
જીવનમાં એક સરસ મિત્ર હોય પૂરતું છે.
મિલાવ હાથ ભલે સાવ મેલોઘેલો છે,
હૃદયથી આદમી પવિત્ર હોય પૂરતું છે.
– રાજેશ વ્યાસ ‘મિસ્કીન’
મહિમા
ભલે આજે નહીં સમજે કોઈ ‘ઉન્માદ’નો મહિમા, ઉનાળામાં જ સમજાઈ શકે વરસાદનો મહિમા. અલગ છે શબ્દનો મહિમા! અલગ છે નાદનો મહિમા, છતાં એક જ છે બંનેથી થતા સંવાદનો મહિમા. જો એ વ્યક્તિ જ હાજર હોય તો એનોય છે આનંદ, નહીંતર આમ ક્યાં ઓછો છે એની યાદનો મહિમા? પ્રણયની વેદનામાં વેદનાનું દુઃખ નથી હોતું, અને ફરિયાદમાં હોતો નથી ફરિયાદનો મહિમા. ‘મુકુલ’ એવી જગાએ જઈ ગઝલ ના વાંચશો હરગીઝ, ગઝલથી પણ વધારે હોય છે જ્યાં દાદનો મહિમા. - મુકુલ ચોક્સી
Comments
Post a Comment