તમે પ્રેમની વાતો કરજો : અમે કરીશું પ્રેમ

રાત દિવસનો રસ્તો વ્હાલમ નહીં તો ખૂટે કેમ?

તમે પ્રેમની વાતો કરજો : અમે કરીશું પ્રેમ.

તમે રેતી કે હથેલી ઉપર લખો તમારું નામ,

અમે એટલાં ઘેલા, ઘાયલ : નહીં નામ કે ઠામ.

તમને તો કોઈ કારણ અમને નહીં બહાનાં નહીં વ્હેમ,

તમે પ્રેમની વાતો કરજો : અમે કરીશું પ્રેમ.

તમને વાદળ, ધુમ્મસ વહાલાં અમને ઊજળી રાત,

અમે તમારાં ચરણ ચૂમશું થઈને પારિજાત.

અહો આંખથી ગંગાયમુના વહે એમ ને એમ,

તમે પ્રેમની વાતો કરજો : અમે કરીશું પ્રેમ.

- સુરેશ દલાલ