છે ફરજ પ્રેમની સાચી તે બજાવી ન શક્યો

છે ફરજ પ્રેમની સાચી તે બજાવી ન શક્યો,

રહ્યો હું મુંગો છતાં ભેદ છુપાવી ન શક્યો.

જોતજોતામાં મેં દુનિયાને મનાવીય લીધી,

તમે કારણ વિના રૂઠ્યા છો, મનાવી ન શક્યો.

ઝાડ તો રોપી શક્યો મારા જીવન-ઉપવનમાં,

ફૂલ કોઈ એની ઉપર હાથે ખિલાવી ન શક્યો.

જિંદગી વેડફી દીધી તેનું કારણ એ છે,

તક હતી એટલી મોટી કે પચાવી ન શક્યો.

સામે મંઝિલ હતી જોયા કીધી, જોયા જ કીધી;

હતી હિંમતમાં ઊણપ, પગ હું ઉઠાવી ન શક્યો.

એના અન્યાયની વાતો તો ઘણી કીધી ‘મરીઝ’,

હતા દુનિયાના જે ઉપકાર ગણાવી ન શક્યો.

 - 'મરીઝ'