ક્યાંથી લાવીએ?

તાપસને તપનું હોય એવું ભાન ક્યાંથી લાવીએ?

અથવા તો સહૃદયીના જેવી તાન ક્યાંથી લાવીએ?

ભીતરથી આરંભાઈ ‘ને પહોંચાડે પાછાં ભીતરે,

અનહદ અલૌકિક આગવું પ્રસ્થાન ક્યાંથી લાવીએ?

પોતે જ આવીએ, ને પોતે આવકારીએ વળી -

હરરોજ ઘરના ઉંબરે મહેમાન ક્યાંથી લાવીએ?

સંવેદનાઓ સઘળી થઈ ગઈ છે ઠરીને ઠીકરું,

ત્સુનામી જેવું લોહીમાં તોફાન ક્યાંથી લાવીએ?

ના, કોઈ પણ રંગો મને એની પ્રતીતિ દઈ શક્યા,

એ મુખડું રમણીય ભીનેવાન ક્યાંથી લાવીએ?

ખીલા તો શું એકેય સાચું વેણ સહેવાતું નથી,

સમતા જ આભૂષણ બને એ કાન ક્યાંથી લાવીએ?

પરભાતિયાં તો આપણે પણ આજ લગ ગાયાં કર્યાં,

કિન્તુ એ નમણાં નામનું સંધાન ક્યાંથી લાવીએ?

- સંજુ વાળા